Cabo Home e a Costa da Vela
No extremo máis occidental da Península do Morrazo atópase Cabo Home, coa impoñente presenza das Illas Cíes que desde aquí parecen ao alcance da man.Situado nunha península entre a pequena ría de Aldán e a ría de Vigo, é un deses lugares máxicos que non debes pasar por alto.
O faro de Cabo Home, construído no século XIX, é o gardián da entrada á Ría de Vigo. A súa sirena, que alerta aos barcos do perigo das rochas nos días de néboa espesa, é coñecida entre os mariñeiros como a Vaca de Fisterra.
A Costa da Vela, que pode percorrerse por un sendeiro dende o propio faro, é un pequeno tramo de costa rochosa e salvaxe, que esconde pequenas calas ás que podes descender a pé. Ollo coas mareas, especialmente a finais de verán.
Atardecer en Cabo Home
O concorrido Miradoiro da Caracola é un punto onde se fixeron miles de fotos do atardecer, pero o carreiro que che leva até o faro está cheo de recunchos tranquilos onde sentar a gozar dun dos atardeceres máis emblemáticos de Galicia, coas Illas Cíes como telón de fondo. A escultura da caracola en realidade chámase A Buguina e representa un tipo de cuncha que os mariñeiros utilizaban a modo de corno para comunicarse ou recibir avisos desde terra.
