O Teixadal de Casaio
O Teixadal de Casaio, situado tamén en terras de Trevinca no concello ourensán de Carballeda de Valdeorras, é o bosque máis antigo de Galicia e unha auténtica reliquia da Natureza única en Europa. Trátase dun pequeno bosque duns 400 teixos, con exemplares que alcanzan idades superiores aos 500 anos e que xa estaba alí na época da conquista romana. De feito, as crónicas contas que os últimos defensores celtas de Gallaecia contra a conquista romana suicidáronse co veleno do teixo, xa que todas as súas partes son tóxicas.
O Teixadal de Casaio está situado nunha zona de difícil acceso, salvada milagrosamente da actividade mineira de explotación de lousa na zona. Para chegar a el hai que camiñar moito por calquera das súas rutas, superar fortes pendentes e, por tanto, estar en boa forma física. Pode ser que por iso conseguira sobrevivir.
A fraxilidade do Teixadal de Casaio
Se decides visitar o Teixadal de Casaio debes saber que se trata dun espazo moi fráxil que hai que tratar con tanto respecto coma se dunha catedral se tratase. O seu principal inimigo é a erosión do chan pola actividade humana, polo que debes evitar pisar fóra do sendeiro, abrazar ás árbores ou levarche “unha poliña de recordo”. Tampouco é un lugar para armar barullo, posto que espantarás á fauna da zona. Lembra que eles están na súa casa e ti non. O mellor é falar en voz baixa e non perturbar a paz do bosque e os seus habitantes.
