Reserva da biosfera Gerês-Xurés

Este santuario natural é un espazo protexido compartido entre Galicia e Portugal. Do lado galego denomínase Parque Natural Baixa Limia-Serra do Xurés, mentres que en Portugal é o Parque Nacional Peneda-Gerês, o único espazo natural portugués catalogado como Parque Nacional.

Estamos nunha zona de transición entre a vexetación atlántica e a mediterránea. A Serra do Xurés, con altitudes que alcanzan os 1.500 metros é un dos grandes santuarios da biodiversidade do noroeste peninsular. Aquí domina os ceos a aguia real, mentres que o lobo é o rei dos bosques. 

Sendeirismo na Serra do Xurés

Numerosas rutas de sendeirismo a ámbolos dous lados da fronteira permitiranche explorar as marabillas naturais desta vasta extensión de montañas, bosques e vales co río Limia como protagonista, co permiso do río Caldo, que recibe este nome polos distintos mananciais termais que se atopan no seu curso, o que fai que as súas augas sexan quentes nalgúns tramos. Frondosos bosques onde a vexetación vai cambiando sutilmente e o carballo empeza a deixar paso a outras especies sureñas, elevadas fervenzas e paisaxes únicas faranche vivir unha experiencia inesquecible. 

Os romanos deixaron aquí a súa pegada en forma de restos de antigos campamentos das lexións, xa que nestas montañas atopábase o único paso que permitía a comunicación entre as capitais romanas de Braga e Astorga.

Xunto ao parque atópase o ‘Couto Mixto’ unha área conformada polas aldeas de Rubiás, Meaus e Santiago, que até 1864 foi unha “terra de ninguén” independente de España e de Portugal.