Pecha os ollos un intre e deixa que a imaxinación te leve a soñar...
deitarte na cima do monte sobre un leito de herba fresca e mol; sentir a brisa suave que aloumiña mentres contemplas a cúpula celeste da Vía Láctea e as constelacións do Norte de fondo, na que unhas invisibles e diviñas mans buscan sorprenderte debuxando máxicas e fugaces raiolas.
Agora abre os ollos e ven facer realidade este soño. Galicia, cos seus ceos escuros e limpos, é un bo escenario para esta éxtase cósmica.
Como cada ano, entre o 11 e o 13 de agosto, incontables partículas liberadas do cometa Swift-Tuttle entran na atmosfera terrestre creando milleiros de trazos de luz. Ese espectáculo celeste de estrelas fugaces que tanto presta e engaiola. Nomeadas como as Perseidas en lembranza de Perseo, a quen segundo a mitoloxía grega, os deuses o converteron en constelación. Seica que para celebrar o xeito en que foi cocebido, cada ano unha choiva de estrelas é derramada sobre a terra, e se queres vela con maior claridade terás que localizar primeiro esta constelación.
Tamén son coñecidas como "bágoas de San Lourenzo", foron así rebautizadas pola tradición católica en memoria das que o santo vertía mentres era martirizado enriba dunha grella de ferro ardente sobre brasas acesas. No que ámbalas dúas lendas coinciden é en convidarnos cada verán a erguer os ollos cara ao ceo e pedir un desexo.
Turismo rural e as Perseidas, unha boa combinación
Os establecementos de turismo rural son lugares privilexiados para vivir esta experiencia astronómica privilexiada. Son o punto de partida para explorar os ceos nocturnos, gozando do silencio e da tranquilidade que o rural ofrece, afastado do ruído, da contaminación e da masificación turística das cidades.
Tanto as persoas anfitrioas como a veciñanza, coñecedoras de lugares acaídos para a observación ben seguro que te han guiar e mesmo compartir historias, enriquecendo unha experiencia inesquecible.
A agarda e a contemplación tamén abren o apetito!
Aproveita para proveerte de produtos da gastronomía local (empanadas, pan, queixos, embutidos, doces ) petiscos e larpeiradas que has poder degustar mentres agardas e contemplas. Que mellor condumio para acompañar unhas noites máxicas!
Galicia: Destino Starlight para quen goza da astronomía
Ceo, xeografía e natureza conforman a nosa paisaxe rural e fan de Galicia un espazo privilexiado para a observación astronómica. A Fundación Starlight, entidade de ámbito internacional, ten acreditados en Galicia diversos espazos que posúen unha excelente calidade de ceo e que son exemplo de protección e conservación. Trátase de escenarios que incorporan a observación do firmamento como parte do seu patrimonio natural, paisaxístico, cultural ou científico, á vez que promoven o turismo de observación de corpos celestes.
Os Destinos Starlight destacan pola súa calidade para a observación astronómica e a protección da escuridade nocturna, permitindo o desenvolvemento de actividades turísticas baseadas neste recurso natural.
- Trevinca: O macizo de Trevinca, en Ourense, érguese como un faro celeste. A súa altitude e a falta de contaminación lumínica convérteno nun dos mellores lugares para gozar da bóveda celeste.
- Costa da Morte: Neste tramo máxico da costa galega, o último solpor na Europa continental é un espectáculo único. Tanto os seus cantís, praias, e cumio dos montes que asexan a costa, son o lugar perfecto para marabillarse baixo o refulxente firmamento.
- Muras, Lalín, a Reserva da Biosfera Mariñas Coruñesas, a Reserva da Biosfera Ancares Lucenses e os montes de Navia, Cervantes e Becerreá e o impresionante Parque Nacional Illas Atlánticas, completan os destinos Starlight de Galicia, onde as noites se acenden grazas as escintilantes lumieiras do firmamento. Lugares máxicos desde os que contemplar as Perseidas ou Bágoas de San Lourenzo, mentres te mergullas na esencia de Galicia, da súa xente, da súa gastronomía e maxia ancestrais.
Consellos para unha noite máxica
- Buscar un lugar escuro: Mantéñase lonxe das vilas e cidades evitando a contaminación lumínica.
- Trae manta, esteira ou colchoneta: Deitarse comodamente permitirache gozar mellor do espectáculo.
- Utiliza unha aplicación de astronomía: axudarache a identificar constelacións, planetas e outros corpos celestes.
- Captura o momento: se dispós dunha cámara, aproveita os sinxelos consellos que atoparás deseguido para fotografar o firmamento.
Consellos de fotografía para inmortalizar ás Perseidas
- Trípode: imprescindible para evitar fotos borrosas.
- Apertura ampla: permitirache capturar máis luz e estrelas.
- Sensibilidade ISO alta (entre 800 e 3200): sen excedela para evitar "ruídos" na imaxe
- Enfoque manual: axusta o foco ao infinito.
- Modo RAW: darache máis flexibilidade á hora de editar as túas fotos.
Preguntas frecuentes
- Cal é a mellor noite para ver as Perseidas? A actividade máxima adoita ser entre o 11 e o 13 de agosto, pero as Perseidas pódense observar durante varias semanas.
- Que equipo preciso? O esencial é un lugar escuro, unha manta e, sobre todo, moita paciencia. Se queres fotografialas, necesitarás unha cámara réflex ou sen espello, un trípode e unha lente brillante.
- Hai eventos especiais relacionados coas Perseidas? Concellos, institucións e colectivos galegos organizan actividades como rotas de sendeirismo nocturno, observacións guiadas e obradoiros de fotografía.
Aproveita esta oportunidade para conectar co universo!
Reserva o teu aloxamento en www.galiciaturismorural.es e prepárate para vivir unha experiencia inesquecible.
