Porque a vellez é, tamén, tempo de aventura
Imaxina pasar uns días nunha casa de pedra rodeada de verde, con xardín, hortas en flor e vistas aos vales. Ou espertar co canto dos paxaros, almorzar produtos caseiros e saír a camiñar entre sendeiros cubertos de flores. Todo iso, agora, con vantaxes pensadas para ti, que tes máis de 65 anos.
A vellez non é unha despedida, senón unha nova xuventude. É o momento perfecto para facer o que antes non puideches, para redescubrir Galicia con outros ollos, ao teu ritmo, sen présas. A Xunta de Galicia sábeo, e por iso pon en marcha unha iniciativa pensada para que as persoas maiores sigan gozando da vida con liberdade e ilusión: o Carné +65.
Que é o Carné +65?
É un documento persoal que permite acceder a vantaxes e descontos exclusivos para persoas maiores de 65 anos. Todas aquelas empadroadas en Galicia reciben o carné de forma automática no seu domicilio. Se por calquera motivo non o recibiron, poden solicitalo escribindo a:
xestion.carne65.maiores@xunta.gal
O seu funcionamento é moi sinxelo: non require activación e funciona igual que o coñecido Carné Xove. Só hai que presentalo nos establecementos adheridos para acceder aos beneficios.
Descontos para descansar e desconectar no rural
Entre os múltiples beneficios que ofrece o Carné +65, destaca un moi especial para quen ama a natureza, a tranquilidade e a autenticidade: descontos de ata un 20 % en casas rurais de Galicia.
Mais iso non é todo. Se estás preparando a túa escapada ao rural, co Carné +65 tamén podes mercar esa chaqueta cómoda para camiñar ou ese sombreiro para o sol primaveral con desconto. Mesmo podes reservar nun dos moitos balnearios galegos e completar así unha experiencia de descanso perfecta.
Porque os descontos abranguen moitos sectores, pero a súa mellor combinación é, sen dúbida, co turismo rural galego.
Como saber que casas están adheridas?
En Galicia Turismo Rural reunimos todas as nosas casas rurais asociadas ao Carné +65, para que che resulte máis doado elixir. Podes consultalas na nosa web.
Alí atoparás información detallada de cada casa, os seus servizos, localización e, por suposto, se ofrecen desconto co Carné +65.
Un rural con calma e alma, todo o ano
Este carné non é só un desconto. É unha invitación a vivir, a descubrir que a Galicia rural está aberta, amable e acolledora durante todo o ano. E, sobre todo, é unha maneira de recoñecer que envellecer con dignidade tamén é poder escoller como, cando e onde queremos gozar da vida.
Porque o rural galego tamén é teu.
Atopa toda a información en:
https://politicasocial.xunta.gal/sites/w_polso/files/carne65/index.html
